Автор: Славчо Ковилоски
Медиум: „Нова Македонија“
Бр. на издание: 24645
Датум: 29.5.2019
Една од најважните карактеристики на хипхопот е неговиот јазик (сленг, односно жаргон). Јазикот на хипхопот е сленговски, креативен и сликовит, понекогаш со навредлив тон и политички некоректен. Според досегашните искуства, за да се предизвика внимание, но и да се искажат сопствените ставови, според припадниците на оваа култура јазикот треба да биде духовит, досетлив, да биде надвор од клишеата, да ја ублажува сериозноста, да покажува припадност итн. Сленговскиот јазик е близок до секојдневниот живот и служи да се создадат поблиски контакти меѓу луѓето од одредена група (ученици, војници, музичари, танчари, спортисти, ЛГБТ-заедницата).
Станувајќи особено популарен во светот од 1990-години тој популаризира мноштво од своите изрази. Ефектот што медиумите го имаат врз секојдневниот живот повлијае хипхопот да стане мејнстрим, односно да се третира како и секоја популарна култура, при што неговите фрази станаа фрази и изрази од секојдневието. Треба да се истакне дека јазикот на хипхопот еволуира секојдневно, како што еволуираат и општествата, музиката, филозофијата. Во таа смисла, ништо не е завршено или готово. Хипхоп-сленгот ќе продолжи да се менува, некои зборови ќе се исфрлаат од употреба, а други ќе се придодаваат во хипхоп-речникот. Она што порано ѝ припаѓаше на помала група, денес го споделува целиот свет.
Јазикот на хипхоп-културата е базиран и на постари изрази дополнети со новосоздаден сленг. Пример за вклучување термини што се одомаќинуваат и се редефинираат во хипхопот се: хот (1920), свинг (1930), хип (1940), кул (1950), соул (1960), чил (1970), смут (1980) итн.
Како што кажавме, јазикот што се употребува во хипхопот претставува посебна приказна. Оксфордскиот речник во 2003 година во својот изворник ја додаде фразата „блинг-блинг“ (со значење: луксузно – накит, телефони), а речникот „Меријам Вебстер“ во 2007 година го додаде терминот кранк (музички термин; означува енергичност, возбуда). Денес, голем број зборови се вклучени во секојдневна употреба во англискиот јазик: худ (скратено од нејбрхуд – маало, соседство), криб (што означува место, престојувалиште) или вип (со значење автомобил). Фразите како „воц ап“ (здраво), „пис аут“ (довидување) или „чил аут“ (олабави се) се сретнуваат постојано во ТВ-сериите, филмовите и литературата, што само докажува дека јазикот е жива материја што постојано се менува и надградува. Всушност, јазикот на хипхопот е посебна тема што ја обработуваат повеќе лингвисти од целиот свет од различни аспекти.
(Објавено во „Нова Македонија“, бр. 24645 од 29.V.2019)