Автор: С. П.
Медиум: „Вечер“
Бр. на издание: 968
Датум: 17.11.1966
По несомнениот успех на првпат организираната забавно-музичка ревија во Универзалната сала - „Гости на нашиот град“, чиј режисер беше Ѓорѓи Македонски, Универзалната сала одлучи да приреди уште една таква ревија. Со тоа секако ќе бидат задоволени желбите на повеќето скопјани кои на првата ревија останаа без билети и немаа прилика да присуствуваат на еден своевиден спектакл на музика и балет.
Вечернава ревија „Гости на нашиот град“ концепциски не се разликува од претходната и во неа повторно ќе се сретнеме со интерпретатори на забавната песна и изведби на една балетска група.
Водач на ревијата ќе биде познатиот белградски артист Перица Славенски, водач и режисер на повеќе успешни ревии во Домот на синдикатите во Белград. На ревијата ќе учествуваат неколку познати имиња на домашната забавна музика: Ладо Лесковар, Нина Спирова, Живан Милиќ и Томислав Маниќ. По подолго време пред скопјани ќе настапи и познатиот ансамбл „Мањифико“, кој неодамна се врати од една поголема турнеја. „Мањифико“ овојпат ќе ни се претстави како трио и за првпат во него нема да настапи солистката Невена Арсова која се наоѓа на болување. Меѓу учесниците на ревијата е и познатиот инструменталист Илија Џаџев, интерпретатор на хавајска гитара. Тој во ревијата „Гости на нашиот град“ ќе се претстави по неодамнешниот настап на софиската ТВ. Балетската група, составена од членови на Балетот на МНТ во кореографија на Ѓорѓи Македонски, ќе изведе неколку игри на модерен балет. Режисер на „Гости на нашиот град“ е ТВ-реализаторот на РТВ Скопје Вељо Личеновски.
(Објавено во „Вечер“ - бр. 968 од 17.ХI.1966)